Askush më mirë se një ish nuk mund të flasë për derbin. Stevan Raçiç është një nga ata që kanë kontribuar për të kuqtë, duke qënë vendimtar në disa përballje ndaj bardhebluve.
Në një intervistë për “Newsport.al”, 37 vjeçari serb flet për supersfidën e të enjtes në orën 19.00 mes Partizanit dhe Tiranës.
Raçiç ka besim se Partizani do dali me 3 pikë, ndërsa bën “profetin” duke thënë se ai që do shënojë e vendos takimin do jetë pikërisht Bardhi. Në fund, nuk mund të mungojë një mesazh për lojtarin e 12-të të anës së kuqe të kryeqytetit.
Si e parashikoni derbin e të enjtes mes Partizanit dhe Tiranës?
Parashikoj fitoren e Partizanit.
Kush mendoni se do e vendosë derbin?
Asnjëherë nuk i dihet. Derbi mund të fitohet vetëm me anë të grupit dhe kolektivit, e jo nga një individ. Do doja që njeriu i Derbit të ishte Bardhi.
Të shënosh në derbi padyshim që ka një “shije” të veçantë, por na përshkruaj pak çfarë ndjesie është?
Një ndjesi për të cilën ia vlen të jetohet. Kulmi i lumturisë është të shënosh dhe të heqësh fanellën.
Kush është më i bukur, derbi në Shqipëri apo Serbi?
Të dy derbit kanë bukurinë e tyre. Më i bukur është ai i Shqipërisë sepse nuk kam humbur asnjëherë.
Si të duket Partizani i Ilir Dajës ?
Daja është një nga trajnerët më të mirë dhe më me përvojë në Shqipëri, së bashku me Shpëtim Duron. Ai ka bërë një ekip të shkëlqyeshëm, me lojtarët që luajnë një futboll modern. Partizani është në duart të sigurta.
Një mesazh për tifozët e kuq.
I dua shumë tifozët e Partizanit. Mesazhi im për ta është që t’i ndihmojnë lojtarët ashtu siç vetëm ata dijnë. Së bashku, mund të arrijmë titullin.
