Java e 36-të e Serisë A uli sot siparin, teksa tashmë kanë mbetur për t’u luajtur edhe 2 xhiro nga fundi i kampionatit. Me Interin kampion, tashmë e gjithë vëmendja është përqendruar te zona Champions dhe lufta për mbijetesë.
Mesa duket, Atalanta, Milan, Napoli dhe Juventusi, do të luftojnë deri në javën e fundit, për të siguruar një “biletë” për në turneun më të rëndësishëm Europian për klube. Për momentin, jashtë Champions-it, mbetet Juventusi, që është renditur në vendin e 5-të.
Rivalitet i ashpër edhe për mbijetesë! Krotone dhe Parma kanë rënë zyrtarisht nga kategoria, teksa Benevento, shpreson deri në fund te mrekullia. Skuadra e Inzagit është me një këmbë në Serinë B, ndërkohë që matematika e mban në lojë.
