Policia e Korçës, ka vënë në pranga 2 persona, pasi akuzohen se në bashkëpunim me njëri-tjetrin mashtronin persona, për të përfituar shuma parash.
Nga njoftimi i policisë bëhet me dije se është ndaluar shtetasi E. J., 36 vjeç, banues në Shkodër dhe shtetasja M. T., 26 vjeçe, banuese në Trevllazër, Vlorë.
Shtetasi E. J. ishte shpallur në kërkim për veprën penale “Mashtrimi” kryer në bashkëpunim, pasi dyshohet se nëpërmjet mashtrimit, iu ka marrë dy shtetasve në qytetin e Korçës, shumat 1800 euro dhe 800.000 lekë. Gjithashtu në momentin e ndalimit në rrugë, shërbimet e Policisë kanë konstatuar se ky shtetas ishte duke drejtuar mjetin pa leje drejtimi.
Pas verifikimeve, shtetasi E. J. rezultonte i shpallur në kërkim edhe nga Drejtoria Vendore e Policisë Tiranë, më datë 18.02.2021, për të njëjtën vepër penale.
Ndërsa ndalimi i shtetases M. T. u bë pasi Prokuroria Përmet ka urdhëruar ndalimin e saj, për veprën penale “Mashtrimi” kryer në bashkëpunim, pasi dyshohet se i ka marrë një shtetasi nga fshati Petran, Përmet, nëpërmjet mashtrimit, shumën 5000 euro.
Ndërkohë Komisariati i Policisë Përmet po kryen veprimet e mëtejshme procedurale në lidhje me këtë rast.
