Një atentat mafioz ka ndodhur një ditë më parë në Vlorë ku si pasojë ka humbur jetën 40 vjeçari Bledar Birçaj.
Nga raportimet mësohet se viktima ka qenë i armatosur. Sipas burimeve, në makinën që udhëtonte 40 vjeçari me shokun e tij polic, është gjetur një pistoletë, por duket se për shkak të kohës së shpejtë që ka ndodhur ngjarja 40 vjeçari nuk ka mundur që të kundërpërgjigjet.
Ndërkohë në dëshminë e tij pasagjeri që ndodhej në makinë ka bërë me dije se kanë qenë të papërgatitur dhe autorët kanë qëlluar 30 herë ndaj tyre.
Krimi i rëndë ndodhi në zonën e quajtur Bishti i Kalldrëmit , në lagjen Hajro Çakerri në Vlorë.
Pistë kryesore e grupit të hetimit është e shkuara e viktimës në Spanjë. Ai rezulton i dyshuar si i përfshirë në një tjetër ngjarje në vitin 2011, por hetimet në lidhje me këtë çështje u pushuan për mungesë provash.
Së fundmi ai kishte qëndruar më shumë kohë në Spanjë prej nga bënte shpesh vajtje ardhje nga Shqipëria. Në Vlorë nuk njihej si person problematik por si biznesmen pasi ishte pronar i një lokali të quajtur “The Boss” të njohur në zonën e Lungomares./abcnews.al
