Një tjetër tragjedi është raportur ditën e sotme në Durrës, ku kanë humbur jetën 3 shqiptarë të Kosovës.
Familja Haliti, ndodhej në shtëpinë e vet në Gjirin e Lalzit, ndërkohë që konsumuan kerpudha të mbledhura nga vetë ata, gjë e cila u shkaktoi vdekjen.
Djali i çiftit që humbi jetën, akuzoi mjeket e qendrës shendetësore të Manzës në Durrës, dhe shprehu dyshime mbi vdekjen tragjike që sipas tij mund të mos ketë ardhur nga kërpudhat. Ai e mbështet këtë gjë tek fakti që ka ngordhur edhe qeni i familjes, që nuk konsumonte kurrsesi kerpudha, dhe kjo është shumë e dyshimtë.
Pikërisht lidhur me këto dyshime një reagim të radhës e ka pasur edhe kreu i Komunës së Gjilanit të Kosovës, Lutfi Haziri, i cili tha se Shqipëria dhe autoritetet e drejtësise në këtë vend e kanë për detyrë të nxjerrin sa më shpejt të vërtetën e kësaj ngjarje tragjike.
Ndërkohë menjëherë pas akuzave të ngritura nga djali i çiftit, është bërë ekspertiza e tre trupave të viktimave nga ekspertët mjeko-ligjorë në Tiranë, ku bëhet me dije se shkak i vdekjes është helmimi.
Burime nga policia Durrës bënë me dije se mjekët ligjorë që kanë kryer ekspertizën kanë dalë në përfundim se vdekja është nga helmi i shkaktuar nga kërpudhat.
