Ndoshta ishte një shenjë fati, ndoshta diçka më shumë, por nëse Torino është pranë mbijetesës në Serie A një ndër meritat kryesore do të shkojë për Mërgim Vojvodën, futbollistin shqiptar dhe titullarin e Kosovës…
I blerë verën e shkuar për 5.2 mln euro dhe i kërkuar nga ish-trajneri Giampaolo, në dy ndeshjet e fundit, shqiptar ka shënuar dy gola që kanë vlerën e 4 pikëve, pikërisht ato që mund të mbajnë në kategori ekipin legjendar italian, Torino.
Kur u ble nga Standard Liege, sigurisht që pati dyshime dhe skepticizëm, aq sa në fillim mezi gjeti hapësira, por Vojvoda me punë dhe sidomos përkushtim, fitoi vendin e titullarit dhe u zhbllokua në sfidën ndaj Parma duke shënuar golin që dha fitoren, ashtu si sot ndaj Verona realizoi golin që solli 1 pikë në barazimin 1-1.
Anësori i djathtë dardan kaloi në avantazh Torinon në minutën e 86-të. Njësoj si në fitoren ndaj Parmës, ishte Ansaldi ai që i dhuroi asistin dhe Vojvoda shënoi një gol të bukur me kokë. Vendasit barazuan dy minuta më vonë. Pikë e mirë për Torinon, që renditet 4 pikë mbi zonën e rrezikut.
