Një person është arrestuar nga policia e Beratit pasi në banesë i është gjetur një armë zjarri pa leje. Nga hetimet paraprake, ai dyshohet dhe si autor i një vjedhjeje të ndodhur më parë.
“Specialistët e krimeve në Komisariatin e Policisë Berat, në bazë të informacioneve të marra se një shtetas në fshatin Kutalli, Dimal, dispononte armë zjarri në banesë, kanë organizuar punën dhe kanë ushtruar kontroll në banesën e shtetasit M.B.. Gjatë kontrollit të banesës, Policia gjeti dhe sekuestroi në cilësinë e provës materiale 1 armë zjarri automatik, një krehër dhe 7 fishekë”, njoftoi policia.
Gjatë veprimeve hetimore paraprake rezultoi se shtetasi M.B., 38 vjeç, është autor i dyshuar i vjedhjes së një shume parash në një pikë karburanti, në datën 22.04.2021, shtuan të njëjtat burime.
