Agim Agushi nga Kosova, ka arritur që të regjistrojë një tjetër rekord me xhonglimin e topit duke hyrë në Librin “Guinness”.
Ai arriti që të veshë dhe të zhveshë bluzën e tij 165 herë, duke mbajtur topin me kokë pa ndërprerje.
Këtë rekord të ri ai e vendosi dje në Shkodër. Gjatë një interviste për Euronews Albania, z. Agushi thotë se për të arritur këtë rekord i është dashur të ushtrojë tri herë në ditë.
Krahas këtij suksesi, ai pohon se sfida e tij më e madhe do jetë ajo e 4 qershorit në Katar, ku duhet të thyejë një tjetër rekord.
“Është një disiplinë jashtëzakonisht e vështirë, por ushtrimet e bëjnë të veten. Unë jam në vijimësi të ushtrimeve, sepse më 4 qershor kam rekordin tjetër në Katar dhe kjo ka qenë si parapërgatitje për sfidën tjetër. Më është dashur një muaj të ushtroj tri herë në ditë”, tha ai.
Ai thotë se këto rekorde nuk shpërblehen financiarisht nga Libri Guinness, por shpreson që një ditë edhe shteti i Kosovës të miratojë një ligj për të shpërblyer ato individë, që arrijnë sukese të tilla.
“Fatkeqësisht shteti i Kosovës nuk e ka me ligj të rregulluar ende se sa duhet të japë një shumë për sportistët që sfidojnë rekordet. Libri i Guinness nuk jep shpërblim për rekordin, përpos një certifikate, ndërsa komplet shpërblimet rekordmenët e Guinness i marrin nga shtetet e tyre. Nga ana e shtetit të Kosovës nuk kemi shpërblim mbase në të ardhmen pritet të rregullohet me ligj. Sfida më e madhe pritet të jetë më 4 qershor në Katar”, shtoi ai.
