Një 51-vjeçar është arrestuar nga policia e Gjirokastrës pasi akuzohet se ka kërcënuar me granatë në dorë punonjësit e Policisë, me qëllim moslejimin e kontrollit të banesës. 51-vjeçari i dënuar më parë për vrasje dhe kontrabandë, tentoi të largohej, por policia iu vu në ndjekje dhe e arrestoi. Gjatë kontrollit në banesë, shërbimet e Policisë i kanë gjetur dhe një armë zjarri kallashnikov me një krehër me fishekë luftarakë.
Aksioni
Policia njoftoi këtë të Shtunë se, specialistët e krimeve në Komisariatin e Policisë Gjirokastër, në bashkëpunim me Forcat “Shqiponja”, në bazë të informacioneve të marra në rrugë policore se një shtetas, në lagjen “11 Janari”, dispononte armë zjarri në banesë, kanë organizuar punën për të ushtruar kontroll në banesën e tij.
Në momentin që shërbimet e Policisë janë afruar pranë banesës së tij, A.I. ka marrë një granatë difensive me vete dhe ka tentuar të largohet duke kërcënuar punonjësit e Policisë që të mos e ndiqnin, pasi do t’i qëllonte.
Shërbimet e Policisë, nisur nga rrezikshmëria që paraqiste ky person, kanë rrethuar zonën në një perimetër të gjerë dhe kanë bërë të mundur neutralizimin dhe prangosjen e këtij shtetasi, i cili mbante me vete një granatë difensive të montuar me ndezës universal.
Gjithashtu, gjatë kontrollit të banesës, Policia gjeti dhe sekuestroi në cilësinë e provës materiale 1 armë zjarri automatik, një krehër dhe 19 fishekë.
