“Një hap më shumë në anën e drejtë” e cilëson ish-deputetja Albana Vokshi vendimin e Gjykatës Administrative që rrëzoi këtë të Premte VKM-në e Qeverisë për kalimin e Kopshtit Botanik nga administrimi i Universitetit të Tiranës te Bashkia e Tiranës.
“Vendimi i Gjykatës Administrative për t’i kthyer Kopshtin Botanik Universitetit të Tiranës është lajmi më i mirë i javës. Vendimi shkon kundër qëllimit të Ramës dhe Veliajt për ta tjetërsuar Kopshtin Botanik për interesa korruptive. Ky është hapi i parë i ndalimit të vjedhjes me vendim special të qeverisë të 15 ha të Kopshtit Botanik, ku rriten 2 mijë specie bimore”,– shkruan Vokshi në një postim në rrjetet sociale.
Ajo shton se duke mbetur kështu siç është, Kopshti Botanik do t’u shërbejë brezave të studentëve dhe kërkuesve shkencorë.
“Falenderoj Rektorin Koni dhe të gjithë pedagogët dhe studentët që nuk hoqën dorë nga kjo betejë e drejtë, pavarësisht presioneve e shantazheve. PD do të vazhdojë të jetë çdo ditë në krah për të drejtat e tyre”,-e mbyll reagimin Vokshi.
