Skënderbeu mund t’ia dalë ndaj Partizanit. Ky është mendimi i Shqiprim Taipit, një prej mesfushorëve më të mirë të Skënderbeut. Në një prononcim të dhënë për “Panorama Sport”, Taipi tregon formën e mirë që po kalon ekipi dhe ecurinë pozitive si rezultat i ndryshimit të kryepankinës.
Për shqiptaro-maqedonasin fitorja është më se e mundshme, teksa tregon çelësin e suksesit ndaj kryeqytetasve të cilët i kanë mundur edhe në transfertë.
Mbijetesa, objektiv i arritshëm për Skënderbeun? Po, më se e drejtë. Kemi rikuperuar pikë me vlerë përballë kundërshtarëve direktë. Kjo na bën që të jemi të bindur dhe të qetë se vetëm duke vijuar me rezultatet pozitive mund të ecim përpara dhe të arrijmë objektivin e duhur. Jemi të bindur se gjithçka është e mundur dhe prandaj jemi në rrugën e duhur. Kjo tashmë duket qartazi edhe nga rezultatet që kemi marrë.
Sfida ndaj Partizanit- Jemi duke punuar fort për këtë takim. Kemi disa ditë që po mundohemi të analizojmë plotësisht kundërshtarin dhe për të parë se ku mund ta godasim.
Është një ndeshje shumë delikate dhe e vësh tirë dhe kjo nuk besoj se ka koment. Jemi në një fazë që çdo pikë është e vlefshme prandaj duhet të tregohemi të kujdesshëm, jemi përgatitur në çdo situatë dhe do të mundohemi të shfrytëzojmë gjithçka.
Ne do të përpiqemi të bëjmë më të mirën tonë dhe të shfrytëzojmë pikat e dobëta të Partizanit. E dimë që është një ekip i vështirë, ndaj edhe për këtë do të jemi shumë vigjilentë në çdo moment. Çelësi i suksesit është që të mos i lëmë të dalin në lojën e tyre. T’i ndajmë dhe të kujdesemi për pasin e fundit.
