Pesë roje bregdetare janë arrestuar pasi akuzohen se kanë lënë të largohej skafistin e gomones që u ndalua rreth 4 muaj më parë në Vlorë.
Rojet bregdetare akuzohen për shpërdorim detyre. Ndaj tyre është caktuar masa e sigurisë arrest me burg nga gjykata e Vlorës, me kërkesë të prokurorisë. Masa që u ekzekutuan nga policia.
Në gomomen e ndaluar në Janar, u evakuuan rreth 50 refugjatë nga vendet e treta, kryesisht sirianë, të cilët synonin të shkonin në Itali. Sipas raportimeve mediatike, gomonia rrezikonte mbytjen, bashkë me personat në bord.
Të arrestuarit janë:
- B., 38 vjeç, banues në Vlorë.
- Ç., 54 vjeç, banues në Vlorë.
- M., 26 vjeç, banues në Vlorë.
- B., 23 vjeç, banues në Vlorë.
- A., 34 vjeç, banues në Vlorë.
Policia njoftoi se “këta shtetas, me detyrë roje bregdetare të Forcës Detare, gjatë operacionit për goditjen e tentativës për kontrabandim në drejtim të Italisë të migrantëve nga vendet e treta, në grykëderdhjen e Vjosës, dyshohen se gjatë evakuimit të personave në bordin e mjetit lundrues, kanë shpërdoruar detyrën, duke mos siguruar shoqërimin e të gjithë personave të evakuuar gjatë operacionit. Konkretisht, drejtuesin e mjetit lundrues (gomone) i cili ka mundur të largohej, shtetasin E. L.(A.), një ndër tre të arrestuarit nga Policia, në muajin janar”.
Materialet në ngarkim të tyre i kaluan Prokurorisë pranë Gjykatës së Shkallës së Parë Vlorë, për veprime të mëtejshme, shtuan të njëjtat burime.
