Komisioni i Ligjeve vendosi një ditë më parë që sot të dëgjonte qëndrimin e Presidentit Ilir Meta lidhur me nisjen e procedurave për shkarkimin e tij, bazuar në nismën e firmosur nga 49 ligjvënës socialistë, një pjesë e të cilëve nuk do të jenë pjesë e Parlamentit të ri.
Por, Presidenca në një përgjigje për Komisionin e Ligjeve sqaron se Ilir Meta nuk mund të jetë i pranishëm për shkak të axhendës.
Ndërkohë theksohet se Presidenti i qëndron datës së parë të kërkuar nga ai 10 maj për tu ballafaquar me këtë Komision.
Ditën e djeshme, përmes një letre të gjatë drejtuar Kuvendit, Meta kërkonte që ballafaqimin ta bënte me datën 10 maj, ndërsa pyeste deputetët socialistë nëse ishin të gatshëm të hetonin edhe shefin e tyre, pra Kryeministrin Edi Rama. Meta e cilësonte Parlamentin aktual mono-partiak, ndërsa Presidencën të vetmin institucion të pakapur nga Rilindja.
