Ish-Presidenti, Bujar Nishani, vijon kritikat ndaj Kreut të PD-së, Lulzim Basha.
Në një intervistë për “Breaking”, Nishani deklaroi se janë me qindra ata që nuk besojnë më në projektin e Bashës, ndërsa shtoi se ai është përgjegjës për situatën në të cilën ndodhet PD.
Sipas tij, parimet mbi të cilat është krijuar PD është liria, besimi e demokracia.
I pyetur nëse ka ambicie për të marrë drejtimin e PD-së, Nishani tha se synimi i tij i vetëm është rrëzimi i Edi Ramës.
“Nuk kam asnjë ambicie. Ambicia ime e vetme është që të rrëzohet Edi Rama, të rrëzohet ky model që se kundërshton asnjë njeri, modelin e shkatërrimit të proceseve zgjedhore dhe që të arrijmë tek kjo ka një proces. Një nga aktorët kryesorë është PD dhe kërkoj që të hapë një proces që të ngrejë besimin. E di që kemi shumë emigrantë jashtë, por nuk jemi në raportin e ponderimit.
Të gjithë e dimë se qindra mijëra nuk besojnë tek projekti i Bashës dhe PD. Basha nuk është e keqja e Shqipërisë se nuk ka qeverisur por po bllokon që të rindërtohet PD. PD ka shumë se kush të kandidojë. Të fillojë njëherë me krijimin e klimës që krijohet kur ka një relaksim politik. Të fillohet me mekanizma sepse më erdhi keq që pashë kryetarët e disa partive në rrethe që thonë se janë deri në fund me Lulzim Bashën.
Ata kanë të drejtë të thonë se do vazhdojnë të punojnë me PD. Kanë një koncept të gabuar që u imponohet, por kjo është përgjegjësia, të rezistosh nga imponimi. Parimet mbi të cilat është krijuar PD është liria, besimi e demokracia. Se kush do të jetë kryetari, është çështje dytësore, gjenden dhe vajza e djem”, tha Nishani.
