Kreu demokrat, Lulzim Basha, është takuar sot me shefen e misionit të OSBE-ODIHR, ambasadoren Ursula Gacek. Takimi vjen një javë pas zgjedhjeve të 25 prillit, ku socialistët morën 74 mandate, PD 59 mandate, LSI 4 dhe PSD 3.
Zgjedhjet ende nuk janë certifikuar, ndërsa Partia Demokratike ka ngritur pretendime mbi manipulimin zgjedhor.
Zgjedhjet e 25 prillit u paraprinë nga një klimë e tensionuar politike, ndërsa akuzat ndaj Kryeministrit Edi Rama kanë të bëjnë me blerjen e votave, presionet, përdorimin e administratës, si dhe intimidimin e votuesve përmes grupeve kriminale.
Koalicioni PD-AN pritet të faktojë përmes një dosjeje të plotë pretendimet e saj, një skemë e ngjashme me atë të përdorur nga opozita në zgjedhjet e vitit 2001, kohë kur ajo drejtohej nga Sali Berisha.
PD nuk është shprehur nëse do të njohë ose jo rezultatin zgjedhor, ndërsa një nga aleatët e saj, Agron Duka i PAA që garonte në Durrës, i ka uruar fitoren Kryeministrit Edi Rama.
