Janë mbyllur 45 minutat e para të dy sfidave, Vllaznia-Teuta dhe Partizani-Apolonia të vlefshme për javën e 31-të të Kategorisë Superiore.
Në sfidën që po luhet në “Loro Boriçi” të Shkodrës, në pjesën e parë skuadrat kanë studiuar njëra-tjetrën teksa ritmi i lojës ka qenë në përgjithësi i ulët. Kanë munguar gjuajtjet e rrezikshme në portat respektive ndërsa përjashtim bën rasti i minutës së 45 ku porta e Teutës shpëton për mrekulli. Stivi Frashi gabon në daljen e tij, duke i dhuruar një shans të artë Hoxhajt, që gjuan brenda zonës, por topi ndalet nga shtylla pingule.
Ndërkohë edhe sfida mes Partizanit dhe Apolonisë vazhdon të jetë në barazim pa gola. Në fakt të kuqtë kanë dominuar plotësisht por pa mundur të gjejnë rrugën e rrjetës. Fillimisht skuadra e Dajës rrezikoi në minutën e 3-të me anë të Asanit por që u tregua i pasaktë me kokë. Vetëm 3 minuta më vonë Asani kishte tjetër rast për gol por këtë herë ndalet nga portieri Harizaj i cili bën heroin për Apoloninë.
Rasti më flagrant i përket minutës së 31-të me Çinarin që provon fillimisht me një gjuajtje të fortë, por pret Harizaj, me topin që shkon të Bardhi, i cili provon me kokë, por gjuajtja e tij ndalet te shtylla.
