Vllaznia-Teuta është supersfida e ditës së nesërme në Kategorinë Superiore. Kryesuesit udhëtojnë drejt Shkodrës në një përballje direkt për titullin kampion.
Ditën e sotme në konferencën për shtyp në krah të zv.trajneri Hodo ishte edhe sulmuesi kryesor, Blerim Krasniqi. Bomberi i Teutës u shpreh se pak rëndësi ka shënon gol, por më e rëndësishme është të fitojë Teuta.
RIKTHIMI TE GOLI – “Normalisht e kam pritur golin shumë. Kishte kaluar një periudhë e gjatë pa shënuar. Normal kur shënon në atë lloj mënyre çlirohesh. Shpresoj të vazhdoj kështu edhe në ndeshjet e radhës, të bëj më të mirën për ekipin”.
PËRSE LUAN LARG PORTËS? -“Për ekipin bëhet gjithçka, jo vetëm goli. Punojmë në të gjitha fazat e lojës, në mbrojtje e sulm. Pastaj pjesa e golit është detyrë për ne sulmuesit. Pavarësisht se kush shënon, me rëndësi është të fitojë ekipi. Kalon në plan të dytë pjesa e shënuesit”.
VLLAZNIA – “Kemi humbur ndeshjen e parë me Vllazninë në Shkodër, kurse këtu më pas kemi dominuar. Shkojmë për tri pikët, si për çdo ndeshje, pastaj pjesa tjetër le t’i mbetet fushës”.
OBJEKTIVI NË SHKODËR – “Normalisht shkojmë për tri pikë, pastaj se çfarë ndodh përcaktohet në fushë. Të gjitha ekipet janë afër, kush gabon më pak do të jetë më i suksesshëm. Ne kemi treguar që te Teuta pika më e fortë është forca e grupit. Kemi pasur edhe ndeshje jo të mira, por pastaj e kemi marrë veten. Kjo tregon që Teuta ka një grup të fortë. Nuk ka asgjë prej së cilës druhemi për ndeshjen në Shkodër. Ne shkojmë të bëjmë punën tonë, pastaj rezultati vendoset në fund të ndeshjes”.
OBJEKTIVAT INDIVIDUALE – “Për sulmuesit besoj se nuk ka shifra golash, sa më shumë të shënojmë, aq më mirë”.
