Jose Mourinho nuk mund të qëndrojë gjatë larg futbollit, por këtë herë preferon të mos nxitohet dhe të mendohet gjatë për rikthimin në stol. Trajneri portugez u shkarkua nga Tottenham më 19 prill. Në një prononcim për Times Magazine, “Special One” flet për të ardhmen.
Një gjë e ka të sigurt, në Bundesligë dhe Ligue 1 nuk do të punojë kurrë si trajner, vendim të cilin e shpjegon qartë. Anglia mbetet gjithmonë destinacioni i preferuar, aty ku ka punuar me Chelsea, Manchester United dhe Tottenham.
“Nuk do të më shihni kurrë duke punuar si trajner në një klub apo qytet ku nuk ekziston presioni. Në Gjermani ose Francë, fati yt është paracaktuar menjëherë nëse drejton Bayern Munchen apo PSG.
Në Angli konkurrenca është tepër e lartë, ky është shkaku pse më tërheq shumë Premier League. Ka shumë presion dhe adrenalinë, pa të cilat unë nuk jetoj dot. E refuzoj punën në një kampionat ku nuk ka presion. Tani kam kohë për të kryer detyrat e shtëpisë dhe për të analizuar situatën.
Do të pres përpara se të rikthehem në futboll. Jo vetëm për klubin e duhur, por edhe kulturën e duhur. Nuk ia kam idenë se çfarë do të ndodhë sezonin e ardhshëm, të shohim“, deklaroi Mou.
