Klodian Duro zyrtarisht nuk do të jetë më trajner i skuadrës së Feronikelit, pas humbjes së pësuar në transfertë me Dritën kampione në fuqi. Prej kohësh e ardhmja e tij ishte vënë në dyshim, por për shkak të kontratës klubi nga Drenasi nuk kishte marrë një vendim ekstrem, pasi i duhet të paguajë një shumë të majme.
Sot ishte dita dhe Feronikeli ka njoftuar si më poshtë: “Komunikatë për media. FC Feronikeli, nëpërmjet kësaj komunikate për media, konfirmon që ka shkëputur bashkëpunimin me kryetrajnerin e klubit, Klodian Duro.
Duke qenë se FC Feronikeli u eliminua edhe nga Kupa e Kosovës dhe duke mbetur shumë mbrapa me pikë në tabelën e Superligës së Kosovës, një ndryshim ishte tejet i nevojshëm, prandaj Kryesia e FC Feronikelit e pa të arsyeshme ndërprerjen e bashkëpunimit me trajnerin, Klodian Duro.
FC Feronikeli falënderon trajnerin, Klodian Duro dhe i dëshiron sukses në karrierën e tij të mëtutjeshme. Drejtimin e klubit, tani në pozitën e kryetrajnerit, do ta marrë, Faruk Elshani”. Duro e kishte marrë drejtimin e Feronikelit në muajin tetor të vitit të shkuar.
