Portieri dhe kapiteni i Partizanit, Alban Hoxha, nuk ka luajtur në dy ndeshjet e fundit kundër Kukësit dhe Laçit, për shkak të një dëmtimi në shpinë. Në seancën e fundit stërvitore në prag të sfidës me Kukësin, Hoxha ndjeu shqetësime në shpinë kur po kryente nxehjen.
Kapiteni i “demave” pësoi të njëjtin dëmtim dhe dy vite më parë dhe pas 28 ndeshjesh radhazi të luajtura në Superiore, u detyrua të qëndrojë jashtë në dy takimet e fundit.
RIKTHIMI – Ditën e djeshme, Partizani kreu përgatitjen e parë stërvitore në kuadër të sfidës kundër Apolonisë që do të luhet të dielën në “Elbasan Arena”. Hoxha ishte pjesë e grupit dhe bëri stërvitje së bashku me dy portierët e tjerë, Aldo Teqjan dhe Livio Malajn. Të tre portierët e Partizanit u stërviten nën urdhrat e trajnerit Ilir Bozhiqi, i cili po ashtu ishte pjesë e seancës stërvitore, pavarësisht incidentit që ndodhi në Laç. Hoxha kreu seancë stërvitore disi më të kujdesshme se dy portierët e tjerë, për të mos rrezikuar me dëmtimin. Të tre portierët u stërvitën së bashku deri në momentin kur erdhi koha për të gjuajtur lojtarët në portë, ku u inkuadruan vetëm Teqja me Malajn.
ZËVENDËSUESI – Alban Hoxha, 33 vjeç, lider dhe kapiten i Partizanit, vështirë se mund të zëvendësohet, pasi kualitetet e tij dihen dhe është një ndër portierët më të mirë në futbollin shqiptar. Pesha e madhe për të zëvendësuar kapitenin, ra në supet e Aldo Teqjas, i cili luajti kundër Kukësit dhe Laçit. Dy sfida tepër të vështira përballë dy rivalëve me kualitet, por Teqja bëri paraqitje të mira. Kundër Kukësit e mbajti rrjetën e paprekur, ndërsa në dy golat e Laçit ishte i pafat, pasi u shënuan nga distanca të afërta. Edhe pse Teqja ka bërë mirë, pa diskutim që rikthimi i Alban Hoxhës, do të ishte një plus i madh për Partizanin, sidomos në këtë fazë të kampionatit.
TITULLI – Hoxha është një nga lojtarët që e ka fituar titullin kampion me skuadrën e Partizanit dhe si kapiten, e di si motivohen shokët e ekipit për t’i shkuar deri në fund kampionatit. Rikthimi i tij do të ishte një plus i madh edhe në dhomat e zhveshjes, ku fjala e tij dëgjohet me shumë vëmendje nga të gjithë. Hoxha pritet të jetë në portë ditën e diel kundër Apolonisë./ panorama sport
