Pesë persona janë arrestuar për vjedhjen e dhunshme të dy bulldogëve francezë që i përkasin Lady Gaga. Në 25 shkurt, sulmuesit qëlluan personin që kujdesej për ta, Ryan Fischer në gjoks dhe morën qentë e Lady Gaga, Koji dhe Gustav. Z. Fischer iu desh të hiqte një pjesë të mushkërive, por i mbijetoi sulmit dhe është në gjendje të mirë shëndetësore.
James Jackson, Jaylin White dhe Lafayette Whaley – përkatësisht të moshës 18, 19 dhe 27 vjeç – janë akuzuar për vrasje në tentativë dhe grabitje. Oficerët akuzuan gjithashtu 40-vjeçarin Harold White, babai i Jaylin White, dhe Jennifer McBride, 50 vjeç, për bashkëpunëtorë të vrasjes në tentativë.
Zonja McBride i ktheu qentë në polici dy ditë pas vjedhjes, pasi Lady Gaga kishte ofruar një shpërblim prej 500,000 dollarë (359,000 £) për kthimin e tyre.
“Detektivët zbuluan se McBride kishte një marrëdhënie me Harold White,” thueht në njoftimin për shtyp të policisë në Los Anxhelos.
Policia tha se të akuzuarit në momentin e sulmit, nuk e dinin që Z. Fischer punonte për Lady Gaga. Por provat sugjeruan që ata e dinin “vlerën e madhe të racës së qenve”, e cila ishte “motivi për grabitjen”.
Z. Fischer ishte duke ecur me tre qentë në një zonë rezidenciale të Hollywood gjatë natës kur sulmuesit dolën nga një makinë. Ai u qëllua në gjoks me një pistoletë gjysmë automatike dhe dy prej qenve u morën. Një tjetër prej bulldogëve të Lady Gaga, Azia, ishte i padëmtuar në incident.
