Oerd Bylykbashi, i cili ka marrë mandatin e deputetit në zgjedhjet e 25 prillit, si pjesë e listës së kandidatëve në Qarkun e Durrësit, ka reaguar për herë të parë pas shpalljes së rezultateve të zgjedhjeve.
Përmes një postimi në rrjet, Bylykbashi shprehet se u ndeshën me një parti shtet të rrethuar me të fortë dhe oligarkë, model të cilin Partia Demokratike do të ringrihet për ta mundur.
Bylykbashi shprehet se ndihet i nderuar që e rritën me 80% PD-në në Durrës.
“Unë besoj se Partia Demokratike është një emër shumë më i madh se kushdo prej nesh. E kemi nder të jemi pjesë kontribuese e saj. PD do të jetë në mbrojtje të lirive dhe të drejtave edhe kur të zëvendësohemi nga të tjerë.
Është fat të lëmë një gjurmë në librin e saj të madh.
Për këtë arsye falenderoj nga zemra të gjithë anëtarët e strukturave të Partisë Demokratike dega Durrës dhe forumin rinor për punën e palodhur këto muaj. Një falenderim i posaçëm u shkon anëtarëve të strukturave të lagjeve të qytetit me të cilët pata nderin të punoj çdo ditë në këtë fushatë.
Duhet të jenë krenarë që arritën të rrisin me 80% Partinë Denokratike. Ky ishte qëllimi juaj dhe i imi si kandidat përtej projekteve personale.
Sot, si 30 vjet më parë me 31 Mars 1991, ne nuk u ndeshëm me Partinë Socialiste por me shtetin padron që përdori çdo pushtet, paranë kriminale e korruptive, kontrollin kapilar si edhe presionin.
Me 25 Prill fitoi shteti i kapur nga të fortët, oligarkët dhe politikat klienteliste. Partia Demokratike do të ngrihet për ta mundur këtë model ashtu siç u ngritëm 30 vite më parë, për një Shqipëri ndryshe dhe për të rinjtë që tek ne kërkojnë shpresë”, shkruan Bylykbashi.
