Zgjedhjet parlamentare përfunduan dhe grumbullimet masive ishin pikërisht ato që ranë në sy. Rikthimi i tifozëve në shkallët e stadiumit është një kauzë që duhet të marrë zgjidhje një herë e mirë.
Drejtuesit e klubeve janë me sytë nga qeveria duke pritur dritën jeshile për të lejuar mbështetësit pranë skuadrave të tyre, sigurisht jo në kapacitetin e plotë të stadiumeve.
Derbi i kryeqytetit është ndeshja e vitit e për këtë Partizani ka intensifikuar bisedimet me përfaqësuesit e Komitetit Teknik të Eksperteve për të lejuar tifozët në shkallët e stadiumit.
Pas Apolonisë dhe Skënderbeut, të kuqtë do të presin Tiranën në “Air Albania. Masat kanë ardhur duke u lehtësuar e në këto kushte pritet një përgjigje pozitive për tifozët duke qenë se stadiumi modern i plotëson të gjitha kushtet për parandalimin e COVID-19. Nëse diçka e tillë do të realizohet, do të ishte fitore e madhe për botën e futbollit e veçanërisht për derbin e kryeqytetit.
Veç kësaj edhe për klubin e Partizanit do të kishte disa të ardhura më shumë, pasi dihet që në derbi çdo tifoz lufton për të siguruar një biletë. Pritet me interes të shihet se çdo të vendosin organet kompetente, çështje për të cilën është kërkuar disa herë rishikim për mundësinë e lejimit të tifozëve, por përgjigja ka qenë gjithmonë negative.
