Partia Demokratike para zgjedhjeve të 25 prillit krijoi një koalicion të gjerë, i cili u emërtua PD-AN në fletën e votimit, ku përfshiheshin një seri partish, kryetarët e të cilëve përgjithësisht u vendosën në vende të sigurta të listës.
Me përjashtim të Nard Ndokës, kreut të PDK, i cili nuk arriti të marrë mandatin e deputetit në Shkodër, të gjithë drejtuesit e partive aleate do të jenë pjesë e Parlamentit të ri.
Shpëtim Idrizi dhe Mesila Doda nga PDIU, Dashamir Shehi nga LZHK, Vangjel Dule nga PBDNJ, Fatmir Mediu nga PR, kanë arritur në marrin mandatin e deputetit për shkak se renditeshin brenda asaj që konsiderohet si lista preferenciale, me përjashtim të Shehit që ndodhej në vendin e 13.
Po sa vota arritën të grumbullonin aleatët e Bashës si kandidatë preferencialë?
Fatmir Mediu, kreu i PR ka marrë në qarkun e Tiranës 5803 vota, ndërsa Idrizi dhe Doda nga PDIU kanë marrë përkatësisht 6510 dhe 1972 vota. Dashamir Shehi nga LZHK ka marrë 4750 vota, ndërsa Dule i PBDNJ-së 686 vota. Me një llogaritje të thjeshtë të gjithë figurat qendrore të aleatëve të PD kanë marrë më pak se 18 mijë vota, çka në rastin e Tiranës nuk mjaftojnë as për dy mandate deputetësh.
