Luciano Spalleti është kandidati kryesor për të marrë drejtimin e Napolit në fund të sezonit. 62-vjeçari qëndron pushim prej majit të vitit 2019, periudhë kur u shkarkua nga Interi. Spalletti ka një eksperiencë të madhe dhe është i përzgjedhuri i De Laurentiis për të zëvendësuar Gattuson në stol.
Maurizio Zamparini, ish-presidenti vullkanik i Palermos (ka qenë edhe president i Venezias në Serie A) flet në Radio Kiss Kiss rreth Spallettit, duke zbuluar edhe një prapaskenë në lidhje me trajnerin. “Uroj që Spalletti të shkojë te Napoli, ai është një trajner i madh.
E mora kur isha te Venezia. Ishte një trajner i talentuar, më pas i shfaqi të gjithë vlerat e tij. Luciano ka një defekt: ka një karakter të vështirë, një toskan puro që mendon se është më i miri në botë. Te Venezia e shkarkova sepse mendoja se na sillte fat të keq.
Ai vishej gjithmonë me të zeza. Bëra një gabim dhe e riktheva në stol. Nuk mund të them nëse do të jetë trajneri ideal për Napolin, pyesni De Laurentiis. Nëse presidenti do t’i formojë një skuadër të fortë, Spalletti do të bëjë mirë“, përfundoi Zamparini.
