Kryeministri Edi Rama u shpreh sot në “Opinion” se është i gatshëm për bashkëpunim me Partinë Demokratike. Rama tha se ftesa është vetëm për Partinë Demokratike, ndërsa vuri si kusht distancimin nga Ilir Meta.
Ndërsa para zgjedhjeve të 25 prillit, Rama kishte si kusht ndaj Lulzim Bashës distancimin nga Sali Berisha dhe Ilir Meta, sot në Opinion, Kryeministri paraqiti si kusht vetëm distancimin nga Presidenti.
“Ilir Meta u dënua nga populli me votë. Ne në Parlament do të formalizojmë shkarkimin e Metës me votë dhe kjo ka marrë fund. Ai është përdhunues i këtyre zgjedhjeve, e mori dënimin nga populli”, tha Rama.
Kryeministri u shpreh se Berisha nuk do asnjë bashkëpunim, do luftë.
“Berisha bëri një deklaratë kundër zgjedhjeve, i tha Lulzim Bashës, mos i njih zgjedhjet. Nëse lidershipi i PD do të ulet në tavolinë do të duhet të përballet me Berishën, pasi ai e ka shprehur tashmë qëndrimin e tij”, tha Rama.
Sipas tij, Berisha e shprehu hapur se është për revolucion.
“Unë e konsideroj bashkëpunimin me PD pa asnjë kufizim. Nuk do të kemi PSD në koalicion, kemi votat për të qeverisur vetëm. Ftesa është vetëm për PD për një bashkëpunim”, tha Rama.
Ai u shpreh se me PD do të bëjë një sforco personale për të shkuar përtej pandemisë politike, e cila na ka degjeneruar në sy të të gjithëve.
