“Paqen e bëjnë skifterat dhe jo pëllumbat”, u shpreh Kryeministri Edi Rama në emisionin Opinion, duke iu referuar ftesës për të bashkëpunuar me Partinë Demokratike, për të cilën tha se duhet bërë një sforco për të arritur një gjë që i duhet vendit.
Ndërsa e konsideroi LSI një thithlopë, që në zgjedhjet e fundit shkoi në realitetin e saj, Rama tha se “populli shqiptar i dha dënimin Ilir Metës, ndërsa ky Parlament që kemi sot do e certifikojë me vendim”.
“Ilir Meta është turp popullor. Partia Demokratike u kthye në peshën e saj elektorale, ndaj dhe unë i shtrij dorën e bashkëpunimit”, tha Rama.
I pyetur nëse do të kërkonte ndjesë për sjelljen e tij gjatë dy mandateve të para si Kryeministër, Rama tha se “ato që kanë ikur i takojnë të shkuarës. Çështja është a është në interesin e vendit që ne të ulemi në një tavolinë dhe të diskutojmë çdo gjë, pa asnjë lloj kufizimi? Ne mund të mos biem dakort për asnjë gjë, por të ulemi, të shikojmë se deri ku do shkohet”.
“Nuk po shkojmë drejt një martese, jemi dy forca politike, kemi marrë një mandat nga populli, PD ka bërë një fushatë që është për tu respektuar, PD ka marrë një rezultat dinjitoz dhe sot ka një oportunitet për Shqipërinë. Kemi marrë mandatin e 3, nuk e shoh si një mandat për triumfator. Jam i gatshëm të ulem me PD, mund të mos jem as unë i zoti të arrij asgjë nga ulja në tavolinë me PD”, tha Rama.
