Kryeministri Edi Rama u pyet në studion e Opinion nëse janë blerë votat në zgjedhjet e 25 prillit apo jo. Rama tha se sondazhet serioze tregojnë se ne ishim mbi të gjithë të tjerët.
“A kam blerë vota? Ju keni bërë një sondazh me kompaninë Trafalgar, e cila është kompania më e besueshme në Botë për sondazhet dhe nuk e keni publikuar.
Nxirreni atë sondazh dhe do e shikoni nëse kemi blerë ose jo vota”, tha Rama.
Drejtuesi i emisionit Blendi Fevziu i tha Ramës se sa herë kishte përballë Sali Berishën ka humbur, ndërsa fitoi pasi u bashkua me Ilir Metën.
“Nxirrni sondazhin që keni bërë ju”, përsëriti Rama, duke kërkuar me insistim nxjerrjen e sondazhit të Trafalgarit.
“Partia Socialiste e Shqipërisë ka marrë 74 mandate dhe nëse nuk do të kishim votat e pavlefshme, do të kishim 77 mandate”, tha Kreu i Qeverisë.
Fevziu në replikë me Ramën i tha “uroj që mos keni arrogancën që keni treguar deri më tani, jini më i qetë, se keni marrë 3 mandate si kryeministër, si askush tjetër në Shqipëri”.
