Gjykata e Posaçme, me kërkesë të SPAK, ka vendosur tu sekuestrojë pasuritë tre ish-gjyqtarëve, pasi sipas hetimeve, ata nuk justifikojnë pasurinë.
Ata janë Fatos Lulo, ish–gjyqtar në Gjykatën Kushtetuese, Bashkim Dedja ish–Kryetar në Gjykatën Kushtetuese dhe Shkëlzen Selimi, ish–gjyqtar në Gjykatën e Lartë.
Hetimet
SPAK bën me dije se në 7 Maj 2020, regjistroi procedimin penal nr.137 për veprën penale të “Refuzimi për deklarimin, mosdeklarimi, fshehja ose deklarimi i rremë i pasurive, interesave privatë të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”.
Nga hetimi penal i kryer, rezultuan të dhëna që Fatos Lulo, Bashkim Dedja dhe Shkëlzen Selimi kishin në pronësi pasuri të paluajtshme, të cilat nuk i justifikonin me burime të ligjshme, apo pasuri që i kanë fshehur.
Për këtë arsye, Prokuroria e Posaçme Kundër Korrupsionit dhe Krimit të Organizuar, paraqiti në Gjykatën e Posaçme të Shkallës së Parë për Korrupsionin dhe Krimin e Organizuar kërkesat përkatëse për sekuestrimin e pasurive në zotërim të tyre.
Sekuestrimet
GJKKO ka vendosur së fundmi sekuestro për pasuri të 3 ish-gjyqtarëve, në përputhje me kërkesat e SPAK.
Më konkretisht, sekuestro u vendos:
Mbi pasurinë në zotërim të shtetasit Fatos Lulo, me sipërfaqe 172 m2, e llojit Njësi/Dyqan, e ndodhur në rrugën e Durrësit, Tiranë.
Mbi pasurinë në zotërim të shtetasit Bashkim Dedja, e llojit apartament, me sipërfaqe 60 m2, e ndodhur në zonën Kryemedhenj, Njësia Administrative Golem-Kavajë.
Mbi 1/2 (50%) e pasurisë e llojit truall 432 m2 dhe objekt 132.25 m2 Karburant/Pikë Tregëtimi, me vendodhje Shetitore Lungomare, Vlorë, në pronësi të shtetasit Shkëlzen Selimi.
Mbi pasurinë e llojit truall, me sipërfaqe 2400 m2 (pasuri e përbërë nga bashkim pasurish), e ndodhur Jonufër, Vlorë, në pronësi të shtetasit Kujtim Selimi.
Mbi 55% e pasurisë e llojit truall, me sipërfaqe 764 m2 dhe godinë me sipërfaqe 57 m2, Karburant, e ndodhur në Rrugën Transballkanike, Vlorë, në pronësi të shtetasit Kujtim Selimi.
