Ambasadorja amerikane, Yuri Kim, kërkoi sot hetimin e çdo krimi zgjedhor dhe përballjen me drejtësinë të personave përgjegjës.
Reagimi i diplomates amerikane ka ardhur pas njoftimit të SPAK lidhur me hetimet e krimeve elektorale.
Kim thotë se edhe Prokurorët duhet të hetojnë, ndërsa shton se ata që shkelin ligjin dhe pengojnë të drejtën e qytetarëve për të votuar në liri të plotë, duhet të ndiqen penalisht.
“Shumë mirë për të parë njoftimin e SPAK për hetimet e krimeve elektorale. Unë e kuptoj që prokurorët do të bëjnë të njëjtën gjë. Ata që shkelin ligjin dhe pengojnë të drejtën e qytetarëve për të votuar lirshëm dhe në paqe duhet të ndiqen penalisht. Askush nuk është mbi ligjin,” shkruan Kim.
Më herët SPAK publikoi të dhënat në lidhje me denoncimet e bëra nga subjektet politike për parregullsi gjatë procesit zgjedhor.
Janë 33 procedime në lidhje me parregullsitë në zgjedhje, 29 prej të cilëve për korrupsion në zgjedhje dhe 2 procedime për përdorim të funksioneve publike për veprimtari politike apo zgjedhore.
