Alban Xhaferi i ka idetë e qarta për ta motivuar skuadrën në sprintin final drejt titullit, por së pari kërkon që të mos dalin pa pikë ndaj Tiranës nesër në “Selman Stërmasi”.
Në një intervistë ekskluzive për “Panorama Sport”, sponsori i shkodranëve zbulon se do të ketë dy rroga bonus për çdo futbollist dhe një premio gjigante ekstra, në rast se Vllaznia shpallet kampione. Xhaferi ka një përgjigje edhe për drejtorin e Partizanit, Olsi Rama.
Alban, kryesoni kampionatin dhe jeni gjithashtu në finalen e Kupës. Më mirë se kaq besoj nuk keni pritur nga Vllaznia?
Tani është momenti që të ecim me sloganin: “Me mendje në kokë dhe jo me këmbë në tokë”. E them këtë, pasi na presin edhe 7 finale në kampionat, ku mund të ndodhë gjithçka. Kemi mundësi ta fitojmë titullin apo Kupën, por gjithashtu mund të humbim në të gjitha aspektet. Suksesi dhe dështimi janë afër dhe duhet të kemi kujdes që nga ndeshja me Tiranën, pasi përballë kemi një kundërshtar që është ende në lojë. Duhet të ecim me mendje në kokë për të kapur atë që kemi nisur. Nuk është momenti të bëhemi euforikë, sepse janë ndeshje vendimtare njëra pas tjetrës. Do të luajmë jo vetëm me Tiranën, por edhe me rivalë direktë si: Partizani, Teuta dhe Laçi.
Është rikthyer entuziazmi i dy fazave të para në ekip apo situata aktuale do një menaxhim perfekt për të shkuar te suksesi?
Jemi në një situatë optimale sa i përket harmonisë në skuadër. Është rikthyer Vllaznia e dy fazave të para. Sigurisht, po bëjmë gjithçka që i duhet ekipit në këtë moment dhe ndeshjet e fundit kanë konfirmuar një Vllazni të bukur. Thjesht unë dua të bëj një apel edhe për vetë opinionin në Shkodër, që nuk duhet të kalojmë në eufori në këtë moment, pasi çdo pritshmëri e tepruar mund të na bëjë dëm.
Drejtori i Partizanit, Olsi Rama, ka thënë se ju keni pasur fatin që në një karrierë të shkurtër keni arritur një fitore kundër të kuqve këtë sezon. Keni një përgjigje?
Gjithmonë, Vllaznia dhe Partizani kanë bërë lojëra të bukura, pasi janë dy klube të mëdha dhe vlera të shtuara të futbollit shqiptar. Unë mbaj mend që drejtori i Partizanit në ndeshjen e parë në Shkodër numëronte tifozët, më pas në fazën e dytë në Elbasan u mor më tepër me baltën, ndërsa në ndeshjen e fazës së tretë në “Loro Boriçi” kishte ankesa për barin e stadiumit. Tani të shohim në ndeshjen e fazës së katërt se çfarë justifikimi do të ketë.
