Vllaznia fitoi dje 2-1 me Skënderbeun në Shkodër. Kuqeblutë përmbysën korçarët, që kaluan në avantazh të parët me Berishën. Do duhej Shehi e Dilaver që gjithçka të kthehej në favor të Vllaznisë, me premiot që nuk kanë munguar.
Edhe pse nuk është bërë publike, sponsori Alban Xhaferi ka akorduar 10 mijë euro për skuadrën, që me tri pikëshin e djeshëm rikthehet në krye të Superligës, në kuotë të njëjtë me Partizanin. Kështu, veç pikëve lojtarët kanë “ngrohur” xhepat.
Edhe javën e parë Vllaznia mori një fitore me peshë në Fier ndaj Apolonisë, teksa mësohet se premio nuk mungoi as në atë sfidë. Tanimë sponsori Alban Xhaferi di si t’i mbajë në tonus të tijtë, duke akorduar premio pas çdo fitoreje, teksa kanë mbetur edhe shtatë javë nga fundi i sezonit.
