Taulant Balla, drejtues politik i PS për Elbasanin, deklaroi mbrëmjen e sotme se zgjedhjet e sotme prodhuan rezultatin më të mirë historik në këto 30 vite për PS-në në këtë qark.
Në një prononcim për mediat, Balla tha se projeksionin i PS për këto zgjedhje është 9 mandate.
“Jam i sigurt se PS ka përtej 90 mijë votave, që do të na mundësonin të kishim mandatin e 9 në Elbasan. Ajo që na duhet, dhe shoh këtu një pjesë të djemve dhe vajzave që do të jenë në procesin e numërimit, na duhet që ky proces të ecë me qetësi. Partitë politike s’ka nevojë të jenë të grumbulluara për të dëmtuar proceset e numërimit”, tha Balla.
Ai tha se administrimi i gjithë dokumentacionit ka rëndësi shumë të posaçme në procesin zgjedhor.
“Unë e di që komisionerët janë të lodhur, por puna e tyre përfundon sa po përfundon dorëzimi, më pas hyjnë ekipet e numërimit, ku janë dy nga PS, dy PD dhe një LSI. Pritshmëria dhe objektivi ynë vazhdon të mbetet 9 mandate në Elbasan. Unë e kam thënë që në Elbasan objektivi ynë minimal është 8 mandate dhe maksimali 9 mandate. Nuk kam asnjë dyshim që e kemi arritur objektivin minimal, por nga raportimet e fundit kemi vota mjaftueshëm për të plotësuar objektivin maksimal.”, tha Balla.
