Partizani do të luajë të mërkurën në transfertë kundër Laçit, në kuadër të javës së 30-të të Superiores. Të kuqtë arritën të fitonin dje me rezultatin 4-0 kundër Kukësit, ndërsa sot i gjithë vendi “zien” prej zgjedhjeve parlamentare.
Megjithatë te kryeqytetasit kjo nuk është në vëmendjen e tyre, edhe pse drejtori i përgjithshëm Olsi Rama, është vëllai i kryeministrit Edi Rama.
“Nuk na lë Ilir Daja të votojmë”, deklaroi mbrëmë Erald Çinari në një panel sportiv gjatë një lidhje të drejtëpërdrejtë. Duke qenë se shumë prej futbollistëve nuk kanë qendrat e votimit në Tiranë, koha nuk premton që ata të bëjnë zgjedhjen e tyre për qeverinë e 4 viteve të ardhshme.
E kjo deklaratë e tij duket se vërtetohet pasi sot paradite skuadra e Partizanit ka zbritur në fushë duke kryer seancën stërvitore.
