Policia jep detaje nga incidenti i ndodhur në një qendër votimi në Lekbibaj të Tropojës më herët gjatë ditës, ku si pasojë u ndërpre dhe procesi i votimit.
Burime zyrtare konfirmuan se një person është arrestuar, ndërsa është dy të tjerë janë shpallur në kërkim.
“Nga Komisioni i Qendrës së Votimit Nr. 0489, e cila ndodhet në shkollën e fshatit Lekbibaj, është kërkuar ndërhyrja e Policisë për një konflikt në ambientet e shkollës. Pas marrjes së vendimit, janë afruar shërbimet e Policisë dhe nga kryerja e veprimeve hetimore ka rezultuar se shtetasi Gj.Gj., përfaqësues i një subjekti politik, së bashku me vëllezërit e tij shtetasit Sh. Gj. dhe M. Gj., kanë kërcënuar me armë zjarri të llojit pistoletë, si dhe goditur me sende të forta shtetasin A. N., përfaqësues i një subjekti tjetër politik. Gjithashtu, këta shtetas në bashkëpunim me njëri-tjetrin kanë dëmtuar dhe shkatërruar pronën e kësaj shkolle, si dhe nuk i janë bindur urdhrit të punonjësit të Policisë”, njoftoi policia.
“Në përfundim të veprimeve hetimore u bë arrestimi i shtetasit Gj.Gj., 62 vjeç, banues në Lekbibaj, për veprat penale ‘Dëmtime të tjera me dashje’, ‘Shkatërrimi i pronës’, ‘Mbajtja pa leje e armëve dhe e municionit luftarak’, ‘Kanosja’ dhe ‘Mosbindja ndaj urdhrit të punonjësit të rendit publik’. Si dhe u shpallën në kërkim shtetasit Sh. Gj. dhe M. Gj. dhe po punohet për kapjen e tyre”, shtuan të njëjtat burime.
Me vendim të Qendrës së Votimit, nga ora 13:35, Policia është larguar nga QV dhe procesi i votimit vijon normalisht, informoi më tej policia.
