Kupa e Shqipërisë në basketboll për meshkuj ka zhvilluar dje në pallatin e sportit “Dhimitraq Goga” ndeshjet e ditës së katërt në Grupin B. Goga Basket e mbyll në vendin e parë grupin, me 4 fitore në po kaq takime. Skuadra private likuidoi Partizanin me rezultatin e thellë 86-58. Ekipi trajnerit Lazimi e nisi dhe e mbylli furishëm, teksa më të mirën e dha në periodën e parë dhe të fundit. 10-minutëshi i parë u fitua nga Goga në shifrat 25-13, ndërsa Partizani u paraqit më mirë në fraksionin e dytë, të cilin e fitoi minimalisht 17-16.
Megjithatë pas pjesë së parë skuadra bregdetare ishte në kryesim 41-30. Perioda e tretë ishte sërish shumë e luftuar, teksa këtë herë vendësit fituan 14-13, për të kryesuar 55-43, kur kishin mbetur edhe 10 minuta nga fundi i takimit. Perioda e katërt nuk kishte shumë histori, pasi Goga shpërtheu në sulm, duke e fituar këtë fraksion loje 31-15, për ta mbyllur të gjithë ndeshjen me 28 avantazh. Katër lojtarë të Gogës regjistruan statistika dyshifrore në aspektin e pikëve, ku më rezultativi ishte Rejm me 19 pikë. Për “demat”, shënuesi më i mirë ishte amerikani Rajt me 16 pikë.
