Pjerin Xhuvani, 56 vjeç, është ekzekutuar me armë zjarri në Elbasan, këtë të Mërkurë.
Nga të dhënat e para, raportohet se Xhuvani dyshohet se është ekzekutuar teksa ka qenë duke lëvizur në këmbë. Ndaj tij, është qëlluar me armë zjarri.
Raportime mediatike të pakonfirmuara ende nga policia thonë se autori është një ish-efektiv policie.
Raportohet po ashtu për plagosjen në këmbë të një punonjëse policie dhe të një personi tjetër. Të dy raportohet se ndodhen jashtë rrezikun për jetën.
Pjerin Xhuvani është përmendur nga Partia Demokratike si pjesë e grupit të simpatizantëve të PS, që u përplasën me ata të PD-së, Ditën e Verës.
Pjerin Xhuvani ka qenë ish kreun i Fondit të Kujdesit shëndetësor për Tiranën, arrestuar në vitin 2015, pas skandalit me rimbursimin e barnave.
Në vitin 2016, u dënua me shërbim prove.
Një makinë është gjetur e djegur në Livadë pas vrasjes. Dyshimet janë se automjeti është përdorur nga autorët për ekzekutimin e Pjerin Xhuvanit.
Disa persona janë shoqëruar lidhur me vrasjen.
Lidhja me politikën
Pjerin Xhuvani ka qenë kryetar i LSI-së në Elbasan. Më pas, ai është arrestuar për korrupsion kur ishte drejtor në Drejtorinë Rajonale të Fondit të Sigurimit të detyrueshëm të Kujdesit Shëndetësor. Pas arrestimit, u përjashtua nga LSI.
Në korrik, 2016, Gjykata e Tiranës e ka dënuar me 3 vjet burg, që iu konvertua ne 2,5 vjet Shërbim Prove, si edhe heqje e të drejtës së ushtrimit të funksioneve publike për 3 vjet, pasi u fajësua për “mashtrim”, “shpërdorim të detyrës”, kryer në bashkëpunim” dhe “falsifikim të dokumenteve”.
Në vitin 2017, ai ishte pjesë e PDIU-së.
Ditën e Verës ai ishte një nga personat e akuzuar nga Partia Demokratike, si pjesë e grupit provokator nga PS, për përplasjen që ndodhi në këtë qytet mes militantëve të të dy kampeve.
