Prokurori Ritvan Sukaj është kthyer sërish në vendin e ngjarjes së sotme në Elbasan. Pas përleshjes me armë mbeti viktimë Pjerin Xhuvani dhe u plagosën katër të tjerë.
Prokurori është kthyer në vendin e ngjarjes ndoshta për të grumbulluar të tjera prova që mund të çojnë në zbardhjen e plotë.
Ngjarja ndodhi në lagjen “5 Maj” të qytetit. Nga shkëmbimi i zjarrit mbeti i vrarë Pjerin Xhuvani, ndërsa të plagosur kanë mbetur një efektive policie, Kelmend Xhaferri si edhe dy persona të tjerë, raporton abcnews.
Policja Xhensila Sota ka marrë një plumb në këmbë, ndërsa në gjendje të rëndë në spital ndodhet një tjetër person, i cili dyshohet se është dhëndri i viktimës Pjerin Xhuvani.
Pak minuta pas ngjarjes u vetëdorëzua në policia ish-efektivi i RENEA-s Arbër Papleka, i cili dyshohet se ka qëlluar me armë ndaj Xhuvanit, gjatë shkëmbimit të zjarrit. Ky i fundit ka thënë se ka qëlluar për vetëmbrojtje.
