Realdo Fili ka gjetur rrugën e rrjetës në kampionatin rumun me fanellën e Botoshanit. Sulmuesi 24-vjeçar u aktivizua si titullar në sfidën ndaj Universita Kraivës, teksa i mjaftuan vetëm 12 minuta, për të tundur rrjetën dhe për të kaluar skuadrën e tij në avantazh.
Falë një këmbëngulje të admirueshme, Fili arriti të fitonte topin dhe me një gjuajtje të kalibruar brenda zonës, e dërgoi topin në trekëndësh, duke mposhtur portierin kundërshtar. Pjesa e parë e sfidës Botoshan-Universita Kraiova përfundoi me rezultatin 1-0.
Ky ishte goli i katërt në kampionat për sulmuesin fierak, i cili po shndërrohet në një protagonist te skuadra e Botoshanit, duke fituar besimin e trajnerit. Fili në të kaluarën ka mbajtur veshur fanellën e Partizanit, Kamzës, Skënderbeut dhe Luftëtarit në Kategorinë Superiore.
