Pas shumë krisjeve gjatë këtyre muajve, duket se më në fund gjithçka është thyer. Kordeiro Melo do të largohet nga Partizani.
Mesfushori brazilian nuk u grumbullua në sfidën e fundit kundër Kastriotit, duke qëndruar gjatë gjithë takimit në tribunë. Kjo gjë, nuk i ka pëlqyer aspak Melos, i cili ka vendosur t’i japë fund aventurës së tij te Partizani.
Por, çfarë e ka çuar mesfushorin brazilian të marrë një vendim kaq drastik në këtë fazë delikate të kampionatit?
Për “Panorama Sport”, Melo tregoi gjithçka duke thënë: “Trajneri nuk më pëlqen mua si lojtar, kështu që unë nuk do të punoj më me të”. Ky vendim i Melos ka ardhur pas disa krisjeve të vazhdueshme me trajnerin Daja. Në merkaton e verës, Melo ishte pranë largimit, por edhe në janar kur flitej për një shkëmbim të tij me brazilianin Viktor da Silva të Vllaznisë.
E gjitha kjo për shkak se Melo kishte kuptuar se trajneri Daja nuk e kishte të preferuar. 27-vjeçari është një futbollist që synon të jetë titullar në çdo ndeshje dhe situata e krijuar, e ka bërë që të marrë këtë vendim.
