Ish-trajneri i Shqipërisë, Gianni De Biasi, ka një patronazhist nga PS-ja dhe për ironi të fatit emri i personit që ka mbajtur në “survejim” është Alban Hoxha. Kujtojmë që trajneri italian ka nënshtetësi shqiptare dhe ka të drejtë vote në Shqipëri.
Vetë trajneri në komunikimin që pati me “Panorama Sport” një ditë më parë mohoi të kishte pasur ndonjëherë biseda me portierin e Partizanit dhe të Kombëtares, duke thënë se nuk është përfshirë kurrë me politikën. Italiani e konsideroi patronazhistin si spiun, por u tregua i kujdesshëm që të mos përfshihej në debate politike.
Duhet të saktësojmë se në listën e të dhënave që qarkullojnë prej ditësh rezulton se ka me dhjetëra persona me të njëjtin emër dhe mbiemër me atë të portierit të Partizanit. Gazeta nuk e la me kaq dhe pyeti vetë kapitenin e kuq nëse ka lidhje me këtë histori, por ai e mohoi në mënyrë kategorike.
“As që e kam idenë fare se për çfarë bëhet fjalë – thotë portieri i Partizanit ekskluzivisht për “Panorama Sport” – Nuk kam lidhje unë dhe as ia them hiç për politikë. E lexova artikullin dhe qesha, por po ju them se nuk kam asnjë lidhje me politikën”, u shpreh portieri.
