Kryeministri Edi Rama ka vijuar i qetë fushatën elektorale, madje duke mos hequr dorë nga batutat dhe propoganda, megjithëse në Elbasan, 4 ditë para zgjedhjeve pati një përplasje me armë ku 1 person humbi jetën dhe 4 të tjerë u plagosën.
Por duket se ngjarja nuk e ka shqetësuar aspak Kreun e Qeverisë, i cili ka vijuar fushatën në Lushnje, nga ku nuk ka lënë mënjanë akuzat në drejtim të Presidentit Ilir Meta apo ish-Kryeministrit Sali Berisha, sikundër edhe ndaj drejtuesve të partive opozitare.
Madje, Rama ka mbajtur një fjalim edhe për Rrapush Xhaferrin, duke i kujtuar lushnjarëve kohën e piramidave, por në asnjë moment nuk ka preferuar të mbajë një qëndrim mbi atë që ndodhi në Elbasan.
Përballë një ngjarjeje të tillë minimalisht Kryeministri do të stepej të paktën në përdorimin e batutave apo humorit kinez mbi të cilën ka ndërtuar fushatën elektorale.
Policia nga ana e saj përmes një deklarate nuk ka dhënë shumë detaje mbi ngjarjen, duke përmendur inicialet e personave të plagosur, viktimës dhe autorit të dyshuar të ngjarjes.
