Gazment Bardhi, drejtues politik i PD në Elbasan, tha mbrëmjen e sotme në Opinion se në makinën e bllokuar nga strukturat për mbrojtjen e votës janë gjetur karta ID, shuma parash dhe lista zgjedhësish.
Bardhi tha se në Elbasan është ngritur një strukturë e mirëfilltë kriminale për blerjen e votave, ndërsa akuzoi Taulant Ballën si përgjegjës për situatën e krijuar.
Sekretari i Përgjithshëm i PD tha se strukturat e mbrojtjes së votës nuk ishin të armatosur, ndërsa shtoi se personi në automjet u kap duke kryer një krim.
“Pasi është bllokuar ky person, u njoftua Policia e Shtetit e cila shkoi në vendin e ngjarjes. Më pas aty kanë shkuar pjesëtarë të grupit kriminal të PS që merret me blerjen e votave dhe aty prej tyre është qëlluar me armë zjarri në prani edhe të policisë”, tha Bardhi.
Ai nxiti policinë dhe prokurorinë që të hetojnë ngjarjen dhe të zbardhin të gjithë të vërtetën.
