Edy Reja ka zbarkuar në Shqipëri dhe një ditë më parë në Shkodër, krah trajnerit të Shqipërisë U19, Armando Cungu, dhe drejtorit teknik Giancarlo Camolese, ka ndjekur grupmoshat e Përfaqësueses Rajonale të Shkodrës, moshat U-13, U-14 dhe U-15.
Italiani, për FSHF.org ka thënë: “U ndjeva shumë mirë në Shkodër, duke parë pothuajse 100 lojtarë që stërviteshin me entuziazëm dhe dëshirë për fanellën që mbanin veshur. Gjithçka ishte e organizuar shumë mirë në fushën e lojës dhe kjo sigurisht që meriton vlerësim, duke parë që puna ecën përpara përtej vështirësi momentale.
Kjo është pjesë e projektit të drejtorit Camolese. Unë mund vetëm të jap këshilla, orientime nga pikëpamja teknike së bashku me bashkëpunëtorët e mi Porrini dhe Bulku. Kemi parë dhe ndjekur gjithçka në detaje. E qartë që tani do të flasim me drejtuesit e Federatës për t’i dhënë një linjë dhe një program të qartë.
Ne do të ndikojmë shumë më shumë me përfundimin e pandemisë, me stafet tona që do të jenë shumë herë më të pranishme pranë përfaqësueseve rajonale dhe skuadrave të moshave, për të hedhur piketa të rëndësishme për një të ardhme të mirë”, është shprehur trajneri Reja, i cili pritet të ndjekë selektimet që Sektori Ekipeve Kombëtare do të zhvillojë për skuadrat Kombëtare U-18, U-19 dhe U-20.
