Në Berat kanë mbetur të indinjuar me humbjen që Tomori pësoi në Peqin përballë Egnatias. Nuk e kanë vetëm me gjykimin, por edhe me stafin teknik.
Është administratori Ismet Ajazi i cili denoncon presionin që i është ushtruar skuadrës dhe trajnerit Bledar Sinella para ndeshjes dhe për këtë akuzon zv.trajnerin Klodian Dervishi.
Gjatë një interviste ekzkluzive për “Panorama Sport”, zyrtari i klubit beratas shfryn edhe ndaj Enea Jorgjit për dy penalltitë skandaloze dhe pret reagim të menjëhershëm nga FSHF-ja.
Ndeshja Egnatia-Tomori, çfarë nuk shkoi në Peqin? Gjykimi i Enea Jorgjit ishte skandaloz. Na nxori dhunshëm nga gara për vendin e parë, me një maskaradë. Hedh poshtë investimin e madh që ka kryer bashkia dhe mundin e skuadrës. Në 30 vite nuk kam parë asnjëherë gjyqtar si Jorgji, që vendos ndeshjen me planifikim apo paramendim. Dha dy penallti në çdo fillim loje me qëllim për ta mbyllur ndeshjen.
Personalisht isha në tribunë, kur në brendësi të stadiumit ka hyrë zv.trajneri i Egnatias dhe ka ushtruar presion jo vetëm psikologjik, por flitet që ka dhunuar dhe provokuar drejtuesit e skuadrës sonë. Më konkretisht, Sinellën. Gjithçka është bërë për të ushtruar presion dhe frikësuar. Kjo është jo vetëm e turpshme, por e dënueshme.
Si vepruat ju dhe skuadra në atë moment? Përse nuk vutë në dijeni delegatin dhe organet e rendit? Unë menjëherë kam bërë relacionin dhe kam vënë në dijeni delegatin Astrit Maçi. Por, më habiti fakti se të gjithë bënin sikur nuk kishin parë gjë. Më pas udhëzuam skuadrën që të ruante qetësinë dhe të luante e qetë futboll. Edhe pse ishin të shokuar me ulërimat dhe goditjet në ambientet e brendshme, treguan karakter dhe e vranë frikën. Të gjithë e kanë identifikuar si zv.trajnerin e Egnatias.
