Partia Demokratike reagoi pasi kryeministri Edi Rama dhe autori i plagosjes në zyrën e PD-së në Kavajë folën me një gjuhë të përbashkët.
PD publikoi një foto ku duket autori i plagosjes, Ndriçim Jonuzi në shoqërinë e kryetarit të Bashkisë së Kavajës dhe dy personave të shpallur në kërkim për ngjarjen e rëndë.
Sipas PD, ky është një sulm kriminal zgjedhor.
“Edi Rama merret me gënjeshtra dhe manipulime ndërkohë që dhunuesit nuk janë arrestuar akoma! Asnjë gënjeshtër nuk e ndihmon dot Ramën, sepse të gjitha faktet dëshmojnë se sulmuesit e djeshëm janë njerëzit e tij dhe kanë vepruar me qëllim. Ky është një sulm kriminal kundër demokracisë sonë nga një njeri që tashmë e di se do t’i humbe zgjedhjet. Të dielën ne do të fitojmë dhe do të sjellim ndryshimin, për të cilin Shqipëria ka nevojë!” deklaron PD.
Përveç Ndriçim Jonuzit (Tahiri), i cili qëlloi me pistoletë simpatizantin e PD, janë shpallur në kërkim edhe 29-vjeçarët Dorjan Troplini dhe Markel Shtylla. Ky i fundit është drejtor i Policisë Bashkiakë Kavajë, dhe Dorian Troplini, punonjës i Bashkisë Kavajë.
Edhe ata shihen në tavolinë me kryebashkiakun Redian Krali dhe autorin e plagosjes.
