Pas ngjarjes së ndodhur në Kavajë, ku është plagosur sekretari i PD-së, Bledar Okshtuni, ka ardhur edhe reagimi i parë nga socialistët, përmes kandidatit për deputet, Etjen Xhafaj.
Në një postim në rrjetet sociale, ai shprehet se ngjarja nuk ka lidhje me politikën dhe zgjedhjet e 25 Prillit.
“Ngjarje si kjo e sotmja nuk përfaqësojnë kulturën dhe qytetarinë e Kavajës. Jam i bindur se ngjarja nuk ka lidhje me politikën dhe ne që garojme për zgjedhjet e 25 Prillit duhet të jemi të parët që jo vetëm ta denojmë aktin e sotëm, por edhe mos ta politizojmë këtë ngjarje.
Zgjedhjet duhet te jenë festë dhe kështu do të jenë në Kavajë e gjithë Shqipërinë. Autoritetet duhet të veprojnë me shpejtësi dhe autorët duhet të vendosen një orë e më parë para drejtësisë”, shkruan Xhafaj.
Në fakt përderisa kandidati i Rilindjes thotë se ngjarja nuk ka lidhje me politikën, në një kohë kur është sulmuar me armë zyra elektorale e PD-së, atëherë ai duhet të japë edhe opsionin se me çfarë ka lidhje ngjarja dhe sulmi me armë. Duket se reagimi i Xhafajt është jo vetëm i sforcuar, por ndoshta edhe një presion ndaj organeve hetimore për ta klasifikuar ngjarjen me një motiv tjetër.
