Komisioni Shtetëror i Zgjedhjeve i ka dërguar një letër dy subjekteve më të mëdha politike në vend ku i kërkon marrjen e masave për respektimin e rregullave të fushatës zgjedhore.
KQZ i kërkon Partisë Socialiste heqjen e materialeve propagandistike nga godinat publike në Gjirokastër, ku në dy banderola të mëdha shfaqen eksponentë politikë të partive opozitare dhe Presidenti Meta duke pozuar si të arrestuarit përpara futjes në qeli.
Gjithashtu KQZ i kërkon Partisë Demokratike heqjen e posterave propagandistikë nga godina e Universitetit Politeknik të Tiranës.
KQZ thekson se ndalohet në mënyrë taksative afishimi i materialeve propagandistike në: fasadat e godinave të banimit, institucionet publike apo ambientet rrethuese pranë e rreth tyre, brenda zonave rekreative, parqeve, në pemët e qytetit dhe në shtyllat e ndriçimit, gjë të cilën, sipas këtij institucioni, dy partitë më të mëdha politike në vend nuk e kanë respektuar.
