Nga dita e hënë, të gjithë nxënësit e arsimit parauniversitar në Kosovë do të kthehen në bankat e shkollës. Ministrja e Arsimit, Arbërie Nagavci bëri të ditur lajmin përmes një postimi në rrjetin social “Facebook” duke shtuar se rikthimi do të bëhet në përputhje me rekomandimet për ruajtjen e distancës dhe higjienës.
Ndërkohë, Ministria e Administrimit të Pushtetit Lokal ka njoftuar se do të hapen edhe restorantet si dhe qendrat tregtare.
Por, sektori i hotelerisë dhe turizmit e konsideron të padrejtë vendimin për të mos lejuar ende zhvillimin e dasmave dhe kërkon nga qeveria që të lejojnë të paktën 200 persona në sallë.
Prej tre javësh tashmë, në Kosovë ka nisur vaksinimi i popullsisë me 24 mijë doza të siguruara nga kompania anglo-suedeze, Astrazeneca përmes programit COVAX.
