Katër persona janë arrestuar lidhur me ngjarjen e ndodhur në Mamurras, konfirmuan këtë të Mërkurë burime policore.
Për plagosjen e trefishtë që ndodhi mesditën e djeshme, është arrestuar efektivi i policisë David Madani. Për ngjarjen janë arrestuar po ashtu dhe Gjon Fufi, Nikoll Fufi ose ndryshe Nikoll Vorfi, si dhe Rudolf Fufi.
Si pasojë e përplasjes me armë që ndodhi dje në qendër të Mamurrasit mbetën të plagosur efektivët e Policisë Ilir Zekaj dhe Flamur Lleja, si dhe vetë Nikolin Vorfi (Fufi). Të tre të plagosurit u dërguan dje në spitalin e Traumës në Tiranë, për trajtim më të specializuar mjekësor.
Policia njoftoi dje se, “rreth orës 13:35, në qendër të qytetit të Mamurrasit disa persona janë konfliktuar me punonjësit e Policisë të Patrullës së Përgjithshme që ishte me shërbim në qytet”.
“Një nga punonjësit e Policisë ka nxjerrë armën e shërbimit dhe ka qëlluar dhe për pasojë janë plagosur dy kolegët e tij, Ilir Zekaj dhe Flamur Lleja, si dhe një nga personat e përfshirë në konflikt, Nikolin Vorfi, të cilët ndodhen jashtë rrezikut për jetën“, shtuan të njëjtat burime.
